លោក Steven Path អគ្គនាយកក្រុមហ៊ុនបច្ចេកវិទ្យា Pathmazing បានមានប្រសាសន៍យ៉ាងដូច្នេះថា «យើងមានសេចក្ដីរំភើបរីករាយក្នុងការដាក់ឱ្យប្រើប្រាស់កម្មវិធីកៀរគរមូលនិធិ KhmerCare ដើម្បីផ្ដល់ មធ្យោបាយថ្មីមួយដល់មហាជនក្នុងការផ្ដល់អំណោយមូលនិធិជួយដល់ការខ្វះខាតរបស់អ្នកដទៃ ។» លោកបន្តថា «កម្មវិធី crowdfunding របស់យើងបង្កើតឡើងដើម្បីប្រមូលផ្ដុំសហគមន៍ និងផ្ដល់នូវវិធីដ៏សាមញ្ញនិងប្រកប ដោយប្រសិទ្ធភាពមួយសម្រាប់គាំទ្រដល់បុព្វហេតុសហគមន៍ និងដល់ប្រជាជនដែលជួបប្រទះការខ្វះខាត។»

KhmerCare ត្រូវបានសម្ពោធដាក់ឱ្យប្រើមិនផ្លូវការដំបូង នៅខែមិថុនា ឆ្នាំ២០២២ និងផ្ដល់នូវប្រភេទ យុទ្ធនាការរៃអង្គាសជាច្រើន ដូចជា ការចំណាយថ្លៃព្យាបាលជំងឺ ការអប់រំនិងអភិវឌ្ឍន៍សហគមន៍ និងការជួយ សង្គ្រោះគ្រាមានគ្រោះមហន្តរាយ ជាដើម ។ ការផ្ដោតសំខាន់ទៅលើតម្លាភាពនិងគណនេយ្យភាពរបស់ប្រព័ន្ធនេះ ធានាថា អំណោយមូលនិធិ១០០%នឹងបានទៅដល់បុព្វហេតុអ្វីមួយ ហើយអំណោយនីមួយៗផ្ដល់លទ្ធផលវិជ្ជមាន និងប្រកបដោយអត្ថន័យ ។

កាលពីខែមុន ហ៊ាង លីហួរ បានប្រើប្រាស់កម្មវិធី KhmerCare ដើម្បីបើកយុទ្ធនាការរៃអង្គាសមូលនិធិជំនួយពី សប្បុរសជនសម្រាប់ថ្លៃវះកាត់ជង្គង់របស់ខ្លួន ។ យុវជនវ័យក្មេងរូបនេះត្រូវបានរកឃើញថាមានជំងឺ Osteochondritis (OCD) នៅក្នុងក្បាលជង្គង់ទាំងសងខាង និងបានបើកការរៃអង្គាសប្រាក់ចំនួន ១២០០០ ដុល្លារ ដើម្បីរ៉ាប់រងថ្លៃវះកាត់ ។ ដោយមានការជួយជ្រោមជ្រែងពីសហការីនិងមិត្តភក្ដិ យុទ្ធនាការរៃអង្គាសថវិកានេះ បានផ្សព្វផ្សាយរាលដាលយ៉ាងលឿន និងសម្រេចបានគោលដៅ ដោយមានមនុស្សជាង ៣០០នាក់បានផ្ដល់ ការបរិច្ចាគគាំទ្រដល់បុព្វហេតុផ្ទាល់ខ្លួនរបស់ លីហួរ ។

លោក Steven Path បានថ្លែងថា «នេះជាយុទ្ធនាការរៃអង្គាសមូលនិធិមហាជនដ៏ជោគជ័យលើកដំបូងគេមួយ នៅលើកម្មវិធី KhmerCare ដែលបង្ហាញឱ្យឃើញនូវឥទ្ធិពលនៃកម្មវិធីក្នុងការជួយដល់អ្នកទាំងឡាយដើម្បីជម្នះ ការលំបាកដែលខ្លួនប្រឈមមុខតែម្នាក់ឯង ។»

លោក Steven Path បានបន្តថា «កម្ពុជាគឺជាប្រទេសមួយដែលមានប្រវត្តិសាស្ត្រស្តុកស្ដម្ភនិងមានស្មារតី សហគមន៍ដ៏រឹងមាំ ។ ជាមួយនឹងការដាក់ឱ្យប្រើប្រាស់កម្មវិធី KhmerCare យើងមានមោទកភាពផ្ដល់នូវកម្មវិធី មួយដែលគាំទ្រគុណតម្លៃទាំងនេះ និងអនុញ្ញាតឱ្យមនុស្សទាំងឡាយអាចជួយយកអាសាដល់មនុស្សដែលនៅ ជុំវិញខ្លួន ។»

លោកជំទាវ ជា សេរី ជំនួយការទេសាភិបាល និងជាអគ្គនាយកធនាគារជាតិនៃកម្ពុជា (NBC) បានបន្ថែមថា “ខ្ញុំសូមចូលរួមអបអរសាទរចំពោះ KhmerCare ដែលបានបើកយុទ្ធនាការ ១ លានដុល្លារនៅថ្ងៃនេះ។ ខ្ញុំគិតថាវាជាការរួមចំណែកដ៏ល្អដល់ការរីកចម្រើននៃវប្បធម៌សប្បុរសធម៌នៅកម្ពុជា។

«ប្រសិនបើយើងធ្វើអ្វីដែលត្រឹមត្រូវ និងកសាងប្រព័ន្ធអេកូដែលពោរពេញដោយតម្លាភាព សុចរិតភាព មនុស្សធម៌ និងសេចក្តីស្រឡាញ់ នោះយើងអាចបណ្តុះវប្បធម៌នៃការចែករំលែក និងសប្បុរសដែលនឹងជំរុញទឹកចិត្តប្រជាជនកម្ពុជាជាច្រើនជំនាន់ទៅមុខទៀត»។

យុទ្ធនាការធំជាងគេបំផុតនៅលើកម្មវិធី KhmerCare ដើម្បីរៃអង្គាសមូលនិធិសប្បុរស ១លានដុល្លារអាមេរិក សម្រាប់ជួយដល់ក្រុមអត្តពលិកកម្ពុជា គឺជាឱកាសដ៏គួរឱ្យរំភើបមួយសម្រាប់ប្រទេសជាតិ ខណៈដែលកម្ពុជា ត្រៀមខ្លួនដើម្បីប្រកួតនៅក្នុងកីឡាស៊ីហ្គេម ឆ្នាំ២០២៣ ជាប្រវត្តិសាស្ត្រដែលធ្វើជាម្ចាស់ផ្ទះដោយកម្ពុជាផ្ទាល់ ។ ជាមួយនឹងគំនិតផ្ដួចផ្តើមកៀរគរមូលនិធិមហាជននេះ អ្នកណាក៏ដោយនៅគ្រប់ទីកន្លែងសុទ្ធតែអាចដើរតួនាទីមួយ ក្នុងការជួយគាំទ្រដល់ក្រុមកីឡាជម្រើសជាតិកម្ពុជា និងលើកទឹកចិត្ដដល់ពួកគេដើម្បីដណ្ដើមជោគជ័យនៅក្នុងការ ប្រកួត ។ មូលនិធិដែលកៀរគរបាននឹងត្រូវយកទៅប្រើប្រាស់ដើម្បីផ្ដល់ការគាំទ្រផ្នែកបរិក្ខារ សម្លៀកបំពាក់ ស្បែកជើង និងការហ្វឹកហាត់របស់ក្រុមកីឡាករជម្រើសជាតិកម្ពុជា និងផ្ដល់ជារង្វាន់លើកទឹកចិត្តជាសាច់ប្រាក់ ដល់កីឡាករជ័យលាភីមេដាយ ។

ក្រុមហ៊ុនធានារ៉ាប់រងអាយុជីវិត AIA Cambodia និងធនាគារ ABA គឺជាអ្នកឧបត្ថម្ភលំដាប់កំពូលសម្រាប់ ព្រឹត្តិការណ៍កីឡាស៊ីហ្គេម និងប៉ារ៉ាហ្គេម នៅឆ្នាំនេះ ។

លោក Andrew Loh ប្រធានអគ្គនាយកនៃក្រុមហ៊ុន AIA Cambodia ដែលជាដៃគូឧបត្ថម្ភផ្លូវការផ្នែកធានា រ៉ាប់រងអាយុជីវិតនិងធានារ៉ាប់រងសុខភាពរបស់កម្ពុជាឆ្នាំ២០២៣ បានមានប្រសាសន៍ថា «ជាកម្មវិធីកៀរគរ មូលនិធិមហាជនលើកដំបូងគេបង្អស់នៅកម្ពុជា KhmerCare នឹងមានសារប្រយោជន៍ក្នុងការលើកកម្ពស់ ការយល់ដឹងនិងរៃអង្គាសមូលនិធិសម្រាប់ជួយដល់ក្រុមជម្រើសជាតិកម្ពុជា ។ ហើយខ្ញុំជឿជាក់ថា យុទ្ធនាការ រៃអង្គាសរបស់ KhmerCare នឹងទទួលបានជោគជ័យនៅគ្រប់មុខព្រួញ ដោយសារតែសេចក្ដីសប្បុរសនិងការ គាំទ្រចេញពីបេះដូងពីសំណាក់ប្រជាជនកម្ពុជា ។»

លោក Askhat Azhikhanov អគ្គនាយកធនាគារ ABA បានមានប្រសាសន៍ថា «យើងមានមោទនភាពដែល កម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមជាលើកដំបូងបង្អស់ បន្ទាប់ពីព្រឹត្តិការណ៍កីឡានេះចាប់បដិសន្ធិឡើង នៅឆ្នាំ១៩៥៨ ព្រមទាំងកីឡាប៉ារ៉ាហ្គេមលើកទី១២ ។ សមិទ្ធផលជាប្រវត្តិសាស្ត្រនេះឆ្លុះបញ្ចាំងពីការអភិវឌ្ឍឥត ឈប់ឈរ កំណើនសេដ្ឋកិច្ច និងស្ថិរភាពនយោបាយរបស់ប្រទេសកម្ពុជា ។»

លោក Azhikhanov បានមានប្រសាសន៍ថា ក្នុងនាមជាក្រុមហ៊ុនសាជីវកម្មដ៏សកម្មមួយ ធនាគារ ABA ដើរតួនាទីរបស់ខ្លួនចូលរួមចំណែកដល់កិច្ចអភិវឌ្ឍន៍របស់កម្ពុជា ហើយការគាំទ្រកីឡាគឺជាការប្ដេជ្ញាចិត្តផ្នែកទំនួល ខុសត្រូវសង្គមដ៏សំខាន់មួយរបស់ក្រុមហ៊ុន ចំពោះប្រជាជនកម្ពុជា ។

លោកបន្តយ៉ាងដូច្នេះ «នេះហើយជាមូលហេតុដែលការគាំទ្រដល់ព្រឹត្តិការណ៍កីឡាស៊ីហ្គេមជាប្រវត្តិសាស្ត្រនេះ គឺជាការស័ក្ដិសមបំផុតសម្រាប់ធនាគារ ABA ។ បន្ថែមពីលើការឧបត្ថម្ភចម្បង ១,៥លានដុល្លារអាមេរិកក្នុងនាមជា ដៃគូធនាគារឧបត្ថម្ភផ្ដាច់មុខ និងជាដៃគូឧបត្ថម្ភផ្ដាច់មុខវិស័យទូទាត់ឌីជីថល យើងបានលៃលកថវិកាដោយឡែក មួយចំនួនដើម្បីគាំទ្រដល់យុទ្ធនាការរៃអង្គាសមូលនិធិសប្បុរសដែលយើងប្រកាសនៅថ្ងៃនេះ ។»

«ខ្ញុំរីករាយក្នុងការប្រកាសថា ធនាគារ ABA នឹងចូលរួមវិភាគទានចំនួន ១៥០.០០០ដុល្លារអាមេរិក សម្រាប់ជា វិភាគទានបដិភាគ «១ដុល្លារទល់នឹង១ដុល្លារ» នៅលើកម្មវិធី KhmerCare ចាប់ពីថ្ងៃនេះតទៅ» ៕

ស៊ីហ្គេមលើកទី៣២ នឹងប្រព្រឹត្តិទៅចាប់ពីថ្ងៃទី៥ ដល់ថ្ងៃទី១៧ ខែឧសភា ហើយអាស៊ានប៉ារ៉ាហ្គេមលើកទី១២ នឹងប្រព្រឹត្តទៅចាប់ពីថ្ងៃទី៣ ដល់ថ្ងៃទី៩ ខែមិថុនា ក្រោមពាក្យស្លោក “កីឡា រស់ក្នុងសន្តិភាព”។

ស៊ីហ្គេមលើកទី៣២ នឹងប្រព្រឹត្តិទៅចាប់ពីថ្ងៃទី៥ ដល់ថ្ងៃទី១៧ ខែឧសភា ហើយអាស៊ានប៉ារ៉ាហ្គេមលើកទី១២ នឹងប្រព្រឹត្តទៅចាប់ពីថ្ងៃទី៣ ដល់ថ្ងៃទី៩ ខែមិថុនា ក្រោមពាក្យស្លោក “កីឡា រស់ក្នុងសន្តិភាព”។

KhmerCare ប្តេជ្ញាធ្វើឱ្យមានផលវិជ្ជមាននៅក្នុងប្រទេសកម្ពុជា និងជុំវិញពិភពលោក។ វេទិកានេះអាចប្រើបានឥឡូវនេះ ហើយត្រៀមខ្លួនរួចរាល់ដើម្បីទទួលយកការបរិច្ចាគ។ សម្រាប់ព័ត៌មានបន្ថែម សូមចូលទៅកាន់គេហទំព័រ KhmerCare តាមរយៈគេហទំព័រ www.khmercare.com។

ដំណឹង